Skip to main content
ActualidadeGuitirizXermade

Guitiriz e Xermade acollen o mércores a cuarta edición da campaña ‘Dálle luz á túa factura’

Por 10 Outubro, 2017Sin comentarios

A nova edición da campaña ‘Dálle luz á túa factura’, coa que a Xunta busca asesorar aos consumidores galegos sobre como reducir o gasto en electricidade, visitará o vindeiro mércores, 11 de outubro, os concello de Guitiriz e Xermade para achegar aos veciños destas localidades consellos útiles cos que poder aforrar no recibo da luz.

Elixir o tipo de contrato máis axeitado para cada fogar, revisar a potencia contratada, valorar a discriminación horaria, ou mesmo saber como proceder á hora de presentar unha reclamación, son algúns dos aspectos que aborda esta iniciativa. As persoas interesadas poderán recibir esta información grazas as charlas que se están a impartir en varios concellos galegos. En concreto, o mércores terá lugar de 16.00 a 17.00 horas na Escola Habanera de Guitiriz, e de 18.30 a 19.30 horas, na Biblioteca Municipal de Xermade.

Como novidade este ano, ‘Dálle luz á túa factura’ conta cun expositor itinerante que vai percorrer as principais vilas de Galicia para que as persoas interesadas poidan recibir información e coñecer máis de preto este tipo de recomendacións prácticas. Impulsada pola Consellería de Economía, Emprego e Industria a través do Instituto Galego de Consumo e o Inega, o obxectivo desta campaña divulgativa é dar a coñecer as principais recomendacións para aforrar no consumo de luz e facilitar a comprensión da factura eléctrica. ‘Dálle luz á túa factura’ está a percorrer diferentes concellos galegos e, este ano, vai estar tamén presente en 15 feiras sectoriais que se celebrarán en Galicia no que queda de ano.

Xunto con isto, para que os consumidores poidan consultar as súas dúbidas, segue en marcha o teléfono gratuíto 900 907 723, así como a páxina de facebook ‘Dálle luz á túa factura’, que complementan o labor de información e asesoramento que se desenvolve a través do Instituto Galego de Consumo e das oficinas municipais de información ao consumidor (OMIC).

Axudar aos fogares galegos
A subministración eléctrica nos fogares é un ámbito prioritario para a Xunta de Galicia polo que supón para o benestar e a economía das familias galegas, especialmente, as máis vulnerables. Neste sentido, o tícket eléctrico social ten permitido apoiar a preto de 7.000 familias desde que se puxo en marcha en 2014, axudándolles ao pagamento da factura da luz con ata 300 euros ao ano. E, do mesmo xeito, tamén as axudas para afrontar os cortes de subministración, que permiten cubrir o custo de dúas mensualidades ao ano por fogar, chegaron polo de agora a máis de 4.000 consumidores galegos.

Ademais, o Plan de vivenda que puxo en marcha o Goberno galego, busca que a rehabilitación de vivendas e a construción de novas edificacións vaia encamiñada a promover a eficiencia enerxética e o uso de fontes de enerxía renovables.