Vilalba Aberta volve facer súa unha nova reivindicación veciñal, neste caso relativa ao “deplorable” estado dunha das beirarrúas da céntrica rúa Alcalde Fraga Bello. A denuncia, que, tal e como revelan dende a formación, chegou á súa asemblea o xoves da pasada semana, foi xa pertinentemente rexistrada no Concello e será no vindeiro Pleno Ordinario de xaneiro, cando ao Goberno Municipal lle toque dar conta diante dunha situación que dende Vilalba Aberta cualifican de “vergoña”.
A este respecto, a formación considera “intolerable” que, logo de se dirixir a veciñanza afectada en dúas ocasións ao Concello, se lles instara a falar eles mesmos cos propietarios. Un “deixamento de funcións”, que para a Vilalba Aberta responde á enésima mostra de inoperancia por parte dun Goberno Municipal, “responsable último de se dirixir aos propietarios diante dunha “situación de risco e incomodidade” para os viandantes, así coma de claro prexuízo – no sentido estético – para os diferentes negocios e comercios”.