Skip to main content
ActualidadeVilalba

Abre o prazo para solicitar as axudas de Turismo para a marca Q de calidade

Por 17 Maio, 2019Sin comentarios

A Xunta abriu esta semana o prazo para solicitar as axudas convocadas pola Consellería de Cultura e Turismo, a través da Axencia de Turismo de Galicia, dirixidas ao sector turístico galego para a certificación, seguimento e renovación da marca Q de Calidade do Instituto para a Calidade Turística Española (ICTE).

A estas achegas poden concorrer establecementos de turismo rural e hoteleiros, apartamentos e vivendas turísticas, campamentos, axencias de viaxes, cafeterías, bares, restaurantes e empresas de servizos complementarios. O procedemento de concesión tramitarase en réxime de concorrencia competitiva.

Os detalles e requisitos da convocatoria pódense consultar no Diario Oficial de Galicia (DOG) deste luns e as solicitudes realizaranse por medios electrónicos a través do formulario dispoñible na sede electrónica da Xunta.

Considéranse actuacións subvencionables as dirixidas á mellora da calidade turística mediante procesos de primeira certificación, seguimento e/ou renovación da marca Q de Calidade Turística do ICTE, correspondentes ao ano 2019 e que se inicien a partir do 1 de xaneiro de 2019. Inclúense, entre outros, os custos de auditoría externa facturados pola entidade auditora acreditada polo ICTE e tamén os derivados dos dereitos de uso da marca Q no ano 2019, unha vez conseguida a certificación, o seguimento e/ou a renovación do establecemento, facturados polo ICTE ao establecemento.

A través da convocatoria do ano pasado accederon a esta liña de achegas 23 empresas do sector turístico da provincia de Lugo. Segundo explicou, houbo beneficiarios da capital luguesa (6); a comarca da Mariña –nos concellos de Ribadeo (5), Viveiro (3), Foz (2) e O Valadouro (1)-; a Zona Sur –nos municipios de Quiroga, Chantada e Sober-; así como nos concellos de Vilalba, Sarria e Palas de Rei. En total, concedéronse axudas por importe de 13.200 euros.