ActualidadeGuitiriz

O Concello de Guitiriz detecta novos problemas no subministro de auga

Por 21 Agosto, 2019Sin comentarios

A alcaldesa de Guitiriz, Marisol Morandeira, chamou á calma aos veciños e veciñas do municipio xa que algúns nos últimos días puxéronse en contacto co Concello debido a que nas súas casas a auga saía dunha cor amarelada.

Marisol Morandeira explicou que este episodio débese a un exceso de ferro presente na auga de forma natural e que, ao clorarse, ocasiona que adopte esta coloración. O ano pasado xa ocorreu un episodio similar e para solucionalo instaláronse unha serie de filtros específicos co obxectivo de reducir a cantidade de ferro presente.

Agora, detectado novamente o problema, o Concello púxose en contacto coa empresa encargada da instalación dos filtros, Aqua System, que acudirá canto antes a Guitiriz para revisar que todo está ben e solucionar calquera defecto nos citados filtros.

A alcaldesa lembrou aos veciños e veciñas que a auga “non é prexudicial para a saúde xa que as análises realizadas diariamente son todos correctos e os niveis de ferro están dentro dos límites normais”. De todos os xeitos, os veciños que detecten calquera anomalía no servizo de auga poden comunicala ao Concello para que quede constancia.