Skip to main content
Actualidade

A poboación en Galicia aumenta por primeira vez en dez anos

Por 28 Abril, 2020Sin comentarios

A poboación de Galicia medrou no ano 2019 ata os 2.700.269 habitantes, o que supón o primeiro incremento de poboación que se rexistra na comunidade autónoma nos últimos dez anos, segundo os datos provisionais do Padrón Continuo publicados hoxe polo Instituto Nacional de Estadística (INE).

En concreto, segundo as cifras do INE a poboación de Galicia a 1 de xaneiro de 2020 situouse en 2.700.269 habitantes, o que representa un aumento de 770 persoas respecto á mesma data de 2019. Este é o primeiro incremento anual de poboación que rexistra Galicia desde o 1 de xaneiro de 2010. Ademais, con este crecemento, Galicia volve superar a barreira dos 2,7 millóns de habitantes.

Os datos do instituto estatístico mostran tamén un crecemento da poboación estranxeira inscrita no padrón galego, que aumentou en 11.154 persoas, ata situarse nos 112.022 habitantes. As principais nacionalidades inscritas no padrón son Portugal (14.739), Venezuela (12.622), Brasil (9.367), Colombia (8.242) e Romanía, con 8.057 habitantes. Este incremento indica que cada vez máis persoas deciden vir a vivir a Galicia desde outros países, ben porque retornan a Galicia ou ben porque deciden instalarse por primeira vez na comunidade autónoma.

Unha vez publicados hoxe estes datos provisionais por parte do INE, o Instituto Galego de Estatística (IGE) vainos incorporar á súa base de datos para realizar a correspondente explotación estatística dos mesmos e proceder posteriormente á súa difusión.