O Ministerio de Transportes, Movilidad e Axenda Urbana (Mitma) aprobou o expediente de información pública e definitivamente o proxecto de trazado de Mellora de seguridade viaria mediante implantación de glorieta na intersección do km 513,670 da N-VI, no termo municipal de Outeiro de Rei. As obras teñen un orzamento estimado de 365.472 euros.
A resolución, que se publicará no BOE proximamente, inclúe unha serie de prescricións como resultado das alegacións presentadas no procedemento de información pública e que deberán incluírse no proxecto de construción.
Na intersección actual do km 513,670 da N-VI, no termo municipal de Outeiro de Rei, un carril central de espera permite os xiros á esquerda desde a N-VI cara á estrada autonómica LU-115. Esta intersección soporta un intenso tráfico viario e peonil debido á proximidade do acceso á autovía A-6, o polígono industrial de Outeiro de Rei e a presenza dunha serie de equipamentos e dotacións existentes na contorna da intersección. Unha parte importante do tráfico da intersección realiza actualmente xiros á esquerda.
A actuación proxectada consiste na transformación en glorieta da actual intersección en T, da estrada N-VI coa estrada autonómica LU-115, mellorando a súa funcionalidade (ao resolver de forma máis adecuada os importantes movementos de xiro existentes) e seguridade viaria, permitindo axustar a velocidade media do tráfico ao seu paso pola travesía de Outeiro de Rei e dispoñendo ademais de novos cruces peonís seguros nos tres accesos á glorieta. Como resultado da información pública, modificarase a localización do paso de peóns na LU-115 para evitar retencións na glorieta.
Así mesmo, contémplase a reposición de itinerarios peonís, paradas de autobús, elementos de drenaxe, sinalización, iluminación e outros servizos que resulten afectados polas obras da glorieta.
