A asociación Por Nuestro Faro de Ribadeo acusa ao Concello de conceder licenzas “políticas” e de que”ven de dar unha nova versión do procedemento de concesión de licenzas que contradí abertamente as reiteradas declaracións, respecto das licenzas concedidas para os apartamentos e o novo proxecto de cafetería na Illa Pancha”.
“Segundo a versión anterior as licenzas son procedementos regrados e o Concello ten que concedelas si ou si, dentro do regulamento. Segundo a versión actual o Concello pode poñer “unha serie de esixencias administrativas” que leven ao promotor a desistir do proxecto. E isto lévanos de novo á motivación do noso recurso contra o proxecto da nova cafetería e á resposta do Concello respecto dos informes do Defensor del Pueblo”, din dende o colectivo.
O colectivo di que “En maio de 2019 a empresa concesionaria da explotación turística da Illa Pancha presentou un novo proxecto de cafetería nos antigos garaxes do faro e que o Concello pola súa banda mantén o segredo mais absoluto ata xaneiro de 2020 que aparece na prensa”.
Por Nuestro Faro solicitou o acceso ao expediente e xurdiron novas “disposicións administrativas” que lles impiden exercer ese dereito ata xuño de 2020. Mentres tanto tramitouse o expediente perante o período de confinamento e a Xunta de Goberno aprobou a licenza de obra o 18 de maio.
O colectivo ribadense presentou un recurso ao abeiro dos 6 informes do Defensor del Pueblo que pedían un Estudo de Impacto Ambiental Simplificado para avaliar os efectos do proxecto, dacordo ca normativa vixente para protección da Rede Natura 2000. Lembran que a Autoridade Portuaria acabou aceptando a realización do Estudo de Impacto Ambiental simplificado pero non se chegou a realizar. O Concello respondeu que as licenzas teñen un procedemento regrado e que neste novo proxecto non procede aplicar os criterios do Defensor.
Así, din dende a asociaicón “obsérvase o criterio político, que non administrativo para decidir cando se aplica unha norma ou outra ou se segue sen aplicar unha norma que nunca se aplicou. Os informes do Defensor van dende o 17 de febreiro de 2017 ata o 10 de outubro de 2018, pero nin a Autoridade Portuaria, nin a Xunta de Galicia, nin o Concello de Ribadeo deron unha resposta coherente en dereito con argumentos xurídicos. En realidade non deron ningunha resposta que non fose a negación da evidencia”.
A última resposta da Autoridade Portuaria comprometíase a realizar o Estudo Simplificado pero non se levou a cabo. “Caese do seu peso que se ese estudo era preceptivo para os proxectos anteriores, como así o recoñeceu a Autoridade Portuaria, con mais motivo o será cando se engaden novos proxectos e actividades que non foron avaliadas anteriormente. E segundo este criterio poderíanse seguir engadindo novas obras e proxectos obviando calquera avaliación”, engaden dende a asociación.
“Aínda máis, seguen incumpríndose as condicións da licenza de apertura, como a non apertura la porta da Illa Pancha ao público en xeral, segue sen aclararse a situación da fosa séptica, a normativa ambiental e as promesas feitas pola alcaldía, como temos denunciado outras veces. En resumen o Concello de Ribadeo prescinde dos informes do Defensor de Pueblo para a concesión de determinadas licenzas seguindo criterios políticos e non administrativos e declara que as licenzas seguen protocolos regulamentados, pero non sempre”, remataron dicindo dende Por nuestro Faro.
