O Concello de Alfoz comunicou a suspensión das clases presenciais nas Escolas Deportivas Municipais e nas actividades deportivas para adultos como consecuencia do covid-19 e das novas medidas tomadas pola Xunta de Galicia, pero atopou unha nova vía de seguir coas mesmas.
“Sabemos que o éxito e o valor destas actividades non só é pola práctica deportiva, senón por ser un lugar de encontro e onde relacionarse, algo fundamental en concellos pequenos e rurais coma o noso. Está claro que a situación actual non recomenda para nada estas reunións sociais pero no que respecta á práctica deportiva non temos porque abandonala cando se conta con medios para ofrecer alternativas”, di.
A Delegación de Deportes de Alfoz, dirixida por César Marrube, anuncia que todas as modalidades deportivas: ioga, aeróbic, ximnasia de mantemento, baile, patinaxe e fútbol serán impartidas polos correspondentes monitores e monitoras a través de vídeos coas sesións de exercicios que se farían na clase presencial e coas indicacións necesarias para a súa correcta realización.
Estes vídeos enviaranse aos grupos de whasapp de cada modalidade para poder continuar traballando desde as súas casas. Comunícase tamén que se suspende o pago das cuotas das actividades deportivas para adultos ata que se reanuden de xeito presencial as clases de ioga, aeróbic, ximnasia de mantemento e baile. As Escolas Deportivas Municipais son gratuítas polo que non afecta este aspecto.
A Delegación de Deportes de Alfoz espera que a iniciativa sexa ben acollida polos usuarios e usuarias como medida temporal ata que as cousas melloren e se poida voltar ás clases presenciais, tamén pide desculpas a aqueles usuarios que non contan con servizo de whasapp, que aínda que se trata de casos moi puntuais, é certo que non chegaría ao 100% polo que se está a falar con eles e mirar posibles alternativas.
