Skip to main content
BóvedaLáncaraLugoMonforteO CorgoSarria

Adif inviste 4 millóns nas estacións de Rubián, Oural, Sarria e Laxosa

Por 6 Febreiro, 2021Sin comentarios

Adif vén de aprobar a licitación das obras de tratamento de plataformas e cruces entre plataformas en catro estaciones do tramo Monforte de Lemos-Lugo, da liña convencional León-A Coruña, por un importe de 4.423.130,56 euros. Os traballos forman parte dos proxectos de modernización do tramo Monforte-Lugo e permitirán mellorar a seguridade de circulacións e usuarios. Á súa vez servirán para adaptar os elementos obxecto deste contrato ás novas condicións de explotación que traerá consigo a electrificación a 25 kV do tramo Monforte-Lugo.

O proxecto define as actuacións necesarias en plataformas, pasos inferiores e outras estruturas das estacións de Rubián, Oural, Sarria e Laxosa, na provincia de Lugo. O obxectivo é adecuar as estacións aos requirimentos técnicos e de interoperabilidade da normativa en vigor, en especial no relativo aos cruces de vías entre plataformas, mellorando as condicións de explotación da liña e potenciando a competitividade da rede ferroviaria galega.

A actuación na estación de Sarria inclúe, ademais, a execución dunha pasarela peonil sobre vías con dobre función: por unha banda, comunicación entre plataformas e, por outro, permeabilidade entre o núcleo urbano de Sarria e o barrio de O Mazadoiro, contribuíndo por tanto á cohesión social, o desenvolvemento sostible e a integración da estación na súa contorna urbana.

MELLORAS  NO TRAXECTO OURENSE-MONFORTE-LUGO 

As actuacións de mellora do tramo en servizo Ourense-Monforte-Lugo, nas que se enmarca esta licitación, teñen como obxectivo cumprir os compromisos de Adif coa optimización das condicións de explotación comercial do traxecto, en parámetros tales como a fiabilidade, o confort e os tempos de viaxe. Os traballos previstos inclúen a modernización e adecuación das instalacións existentes, así como a electrificación a 25 kV en corrente alterna do corredor, adaptando a electrificación existente no tramo Ourense-Monforte e dotando de catenaria e instalacións eléctricas ao tramo Monforte de Lemos-Lugo.

A primeira destas melloras, a variante da Pobra de San Xiao, xa está en servizo desde abril de 2018. Entre os principais beneficios deste novo trazado, duns 7 quilómetros de lonxitude, destaca a supresión dos 14 pasos a nivel do anterior, co consecuente aumento da seguridade ferroviaria, viaria e peonil, así como o incremento da velocidade de paso dos trens ata o 160 km/ h.