O Concello de Sober e o CEIP Plurilingüe Virxe do Carme organizan este xoves un encontro por videoconferencia coa doutora Susana Rodríguez González. A actividade foi deseñada para conmemorar o Día Internacional da Nena e a Muller na Ciencia, que se celebra cada 11 de febreiro.
A doutora, natural de Sober, é especialista en medicina física e rehabilitación, e ela mesma foi alumna do CEIP Plurilingüe Virxe do Carme. Na actualidade, Susana Rodríguez é doutora da Unidade de Rehabilitación Neurolóxica e Dano Cerebral do Hospital Universitario Vall d’Hebron de Barcelona.
A conexión por videoconferencia farase ás 11:30 horas e será seguida polo alumnado desde a Biblioteca do centro. O Concello de Sober agradece a colaboración da médica, que achegará a súa experiencia aos nenos e nenas do municipio.
