A Asociación de Comerciantes e Empresarios de Sarria (ACES) vén de entregar os premios da campaña de Nadal da Federación de Comercio de Lugo. As afortunadas foron Lidia Castro, Mónica López e Elda Valcárcel, que acadaron os seus premios por compras realizadas nos negocios Los Sueños de Uxía, Cactus Rose e Cris Abad, do Centro Comercial Urbano de Sarria.
As gañadoras recibiron este martes as súas tarxetas prepago, por un valor total de 800 euros, para gastar no comercio local.
A campaña ‘Este Nadal, o comercio de Lugo máis preto de ti’ desenvolveuse entre o 6 de decembro e o 6 de xaneiro co fin de potenciar as compras no pequeno comercio da provincia. En total, rexistráronse máis de 37.000 participacións correspondentes a transaccións realizadas por clientes de 40 localidades. Sorteábanse 10.000 euros, distribuídos en tarxetas de 300 e 200 euros.
