O presidente do comité de empresa de Alcoa San Cibrao, José Antonio Zan, volveu pedir axilidade nas negociacións coa Sociedade Estatal de Participacións Industriais (Sepi) para a venda da factoría. Así mesmo pediu unha reunión urxente a Ministerio e Xunta “para saber exactamente no punto no que estamos”.
O comité de empresa participou onte na reunión multilateral requerida no trato entre as partes para levantar a folga e avanzou algúns dos atrancos burocráticos do proceso de venda e dos que informaron aos membros do comité.
Así mesmo, Alcoa comezou xa cos traballos técnicos para proceder á división da fábrica mentres o comité urxe chegar a un acordo e que se “dean pasos firmes e sólidos” para levar a cabo a compra.
