Ciudadanos de Lugo levará ao vindeiro pleno unha proposta para poñer en marcha un programa municipal de atención ás familias monoparentais.
O concelleiro Juan Vidal-Pardo explica que “as consecuencias da actual crise sociosanitaria están tendo un impacto moi preocupante sobre as familias monoparentais. De feito, o 42,9 % deste tipo de familias están en risco de pobreza a nivel nacional, unha situación que representa á perfección a situación que se vive en Lugo onde gran parte deste tipo de familias sobrevive grazas á axuda externa ao núcleo».
Desde Ciudadanos ven “necesario” que o Concello “impulse iniciativas que revirtan a ausencia dun recoñecemento legal deste modelo de unidade familiar, xa que están instaladas nun limbo administrativo que as mantén en desventaxa comparativa ante as medidas urxentes excepcionais tomadas ante a crise da covid”. Unha mostra diso é, segundo Vidal-Pardo, a ausencia dun regulamento específico que articule e protexa este modelo de familia no concello de Lugo.
Así, a formación laranxa solicitará ao grupo de goberno a posta en marcha dun programa específico de atención ás familias monoparentais, que recolla, entre outras cuestións, “o trato como familia numerosa con polo menos dous fillos, a condición de vulnerabilidade, garantía habitacional e axilización de trámites e burocracia para este tipo de núcleos familiares”.
Proporán ademais que o Concello consigne unha partida específica para proporcionar recursos para a conciliación, apoios domiciliarios puntuais para as saídas básicas, e posibles solucións de urxencia ante a imposibilidad de afrontar pago de alugueres, hipotecas ou subministros.
