O IES A Pinguela vén de presentar a súa oferta de accións formativas para desempregados, que se levarán a cabo ao longo do ano. Os cursos son de balde e teñen prazas limitadas.
O centro impartirá tres cursos, que darán comezo o vindeiro mes de abril. O primeiro, tratará sobre ‘Servizos auxiliares de salóns de peiteado’. Desenvolverase desde o día 7 de abril ao 15 de xullo, en horario de 16.00 a 21.00 horas, ata completar un total de 348 horas.
O mesmo día, 7 de abril, comezará outra das accións formativas, neste caso de ‘Arranxos e adaptacións de prendas e artigos de téxtil e pel’. A actividade manterase ata o 30 de xullo, en horario de 16.00 a 21.00 horas, para acadar 408 horas.
Por último, dentro da oferta AFD para este curso, o IES A Pinguela ofrece o curso de ‘Sistemas microinformáticos’. Neste caso, a actividade comezará o 23 de abril e prolongarase ata o 18 de novembro, no mesmo horario dos anteriores, pero cumprindo un total de 618 horas.
Para realizar algún destes tres cursos, os solicitantes deben estar inscritos no Servizo Público de Emprego. As persoas interesadas poden solicitar máis información ou inscribirse nas propias oficinas. Coa posta en marcha destas accións preténdese favorecer a súa empregabilidade.
