A Xunta contribúe á dinamización da veciñanza do concello de Riotorto co apoio a melloras das catro asociacións veciñais do municipio – Escola da Asnela de Espasande de Arriba, Augaxosa, Chacín e Vilaseca- que recibiron 68.000 euros na convocatoria do ano pasado das axudas do Plan específico de acción comunitaria.
Por unha parte, tal e como puido comprobar hoxe a directora xeral de Administración Local, Natalia Prieto, xunto co delegado territorial da Xunta en Lugo, Javier Arias, no centro social de Espasande de Arriba, a subvención de 17.000 euros concedida á asociación veciñal Escola da Esnela posibilitou substituír a cuberta do inmoble, xa que o tellado atopábase moi deteriorado, así como instalar un baño adaptado e unha rampla de formigón na entrada para as persoas con mobilidade reducida, ademais de dotar o edificio do mobiliario axeitado para as actividades que realiza a veciñanza.
Tamén visitou o local da asociación de veciños de Augaxosa, que cunha inversión tamén de 17.000 euros, ampliouse de maneira que o edificio conta agora con 24 metros cadrados a maiores. Deste xeito, acadouse máis espazo para a realización das diferentes actividades que organiza o colectivo veciñal, ao que a Xunta apoiou tamén coa compra de utensilios para o seu desenvolvemento.
A mesma contía recibiu a asociación de Chacín para a rehabilitación da cuberta co obxectivo de evitar humidades e a instalación dunha rampla de acceso á planta baixa, así como a adquisición de material. E no caso de Vilaseca a axuda da Xunta permitiu mellorar a accesibilidade, acondicionar e pechar o local da barbacoa, ademais do pintado de varias zonas de local e a renovación de parte do mobiliario.
Estas axudas encádranse no Plan específico de acción comunitaria, dirixidas a asociacións de veciños, confederacións, federacións ou unións de asociacións veciñais, comunidades de usuarios de augas e asociacións de mulleres rurais de Galicia, nas que o Goberno galego investirá ao longo deste ano 2,5 millóns de euros.
A Administración autonómica investiu na última década cerca de 900.000 euros no concello de Riotorto, ao abeiro doutras axudas habilitadas pola Xunta para mellorar as infraestruturas e os servizos dos concellos galegos, coa finalidade última de mellorar tamén a calidade de vida dos seus veciños.
