O vindeiro luns, 19 de abril, dará comezo a segunda edición do curso de interpretación de planos no sector naval que organiza Apaga (Asociación de Profesores de Automoción de Galicia) coa colaboración do estaleiro asturiano Gondán.
A primeira edición do curso, para a que se presentaron 43 solicitudes, arrincou o pasado 5 de abril nas instalacións de Apaga, en Ribadeo, e conclúe no día de hoxe. Quince foron os alumnos que recibiron 30 horas de formación ao longo das dúas últimas semanas da man dun técnico do estaleiro de Castropol.
O presidente de Apaga, Álvaro Doural, sinala que “debido ao gran número de solicitudes presentadas para asistir a este curso e co obxectivo de atender toda a demanda poñemos en marcha xa a segunda edición que se celebrará de luns a venres do 19 ao 30 de abril. Todas as prazas están cubertas desde hai tempo”.
Doural anuncia que “temos programada xa a terceira edición do 3 ao 14 de maio. Neste caso aínda dispoñemos dalgunha praza libre. As persoas interesadas poden poñerse en contacto connosco en apagaribadeo@gmail.com ou nos números de teléfono 639 88 49 45 e 629 096 711”.
Doural realiza un balance moi positivo desta nova oferta formativa de Apaga: “creo que se iniciou un ciclo importante de colaboración con Estaleiros Gondán, que esperamos seguir mantendo. Penso que era necesario responder á súa demanda e colaborar cun sector tan puxante na zona”.
