O Concello de Samos vén de recibir unha subvención de case 582.000 euros do Instituto para la Diversificación y Ahorro de la Energía (Idae), dependente do Ministerio para la Transición Ecológica y el Reto Demográfico, para a renovación do alumeado de todo o municipio. O coste total da actuación ronda os 730.000 euros.
O proxecto contempla a renovación dos 1.238 puntos de luz do concello, que pasarán a ser de tecnoloxía led, así como dun cento de cadros eléctricos co fin de adaptalos á normativa da Comunidade Europea vixente.
Desde o goberno local aseguran que este cambio no alumeado suporá non só “mellorar moito a calidade da luz”, senón tamén un aforro enerxético “do 53%”.
