Skip to main content
Vilalba

Vilalba abre hoxe a programación cultural prevista para maio

O Concello de Vilalba, desde a súa área de Cultura, vén de anunciar o cartel coas citas do mes das letras, en colaboración con outras entidades como o Instituto de Estudos Chairegos, cunha oferta variada de teatro, música, literatura e audiovisual en galego, facendo fincapé na figura de Xela Arias, homenaxeada nas Letras Galegas deste 2021.

TEATRO

O auditorio municipal acollerá dúas obras de teatro. A primeira delas, Cinco minutos sen respirar, unha adaptación da obra do dramaturgo Gustavo Ott, que fala da vida, dos abusos bancarios, do amor, da explotación laboral, do suicidio, da familia, etc. Ademais, tamén estará Manuel Manquiña nunha divertida obra teatral, Relatos Negros.

PREMIOS MESTRE MATEO

Os filme finalistas nos premios Mestre Mateo serán proxectados en Vilalba nas fins de semana deste mes de maio, da man do Iescha en colaboración coa Deputación de Lugo, a Academia Galega do Audiovisual e o Concello de Vilalba. O primeiro será esta tarde e o resto os sábado 15, 22 e 29.

XELA ARIAS

A escritora homenaxeada no Día das Letras Galegas 2021 terá un espazo importante nesta programación, cunha conversa arredor da súa figura que realizará Marta Veiga, e cun espectáculo de música, poesía e fotografía protagonizado por A Banda da Loba, a poeta Tamara Andrés e as instantáneas de Xulio Gil, viúvo da homenaxeada.

LIBRO DE POESÍA

Xerardo Quintiá, gañador do XLVI Premio de Poesía do Certame Literario de Vilalba fará a presentación do seu libro co poemario Obra inacabada de Dosinda Christensen. Será o venres 28 para pechar o mes.

Xa se poden coller as entradas dos eventos que terán lugar no Auditorio Municipal, na web entradasvilalba.es ou na Casa da Cultura.