Un grupo de funcionarios de máis de 60 anos de Galicia manifestaron sentirse “marxinados” polo Sergas ao non ter recibida a vacinación contra o coronavirus nin estar previsto que a reciban.
Trátase en particular daqueles funcionarios que cando entrou en vigor a Ley de 1984, na que tiveron que escoller con que cobertura médica quedaban, optaron por unha mutua sanitaria privada xa que a partir dese momento o resto quedaban baixo a cobertura da Seguridade Social. Así o explica un dos funcionarios do Concello de Xermade de 62 anos con 40 de cotizacións ao seu lombo.
Malia seguir cotizando relixiosamente á entidade pública, estes traballadores, a maior parte deles maiores de 60 anos, atopáronse agora con que non están nas listaxes de Sanidade para a vacinación. De feito, o seu rango de idade xa tiña que estar vacinado ou polo menos convocados.
Nun primeiro momento estas persoas recibiron a notificación de que sería Adeslas a que xestionaría a súa vacinación para que Sanidade os incluíse na listaxe. A mútua asegurou posteriormente que a Xunta lles obriga a facer eles a vacinación aínda que non teñen acceso ás doses.
Situados nun limbo legal, estes funcionarios, que se puxeron en contacto coa Xunta de Galicia, recibiron a notificación de que poderían optar á vacinación a través do sistema que utilizan os desprazados.
“45 minutos de espera ao teléfono para seren tratados como desprazados, cando levamos toda a vida cotizando como o resto de persoas”, explica o funcionario de Xermade.
