O CB Ensino impulsa o proxecto Benvido Xacobeo 2021! O baloncesto miúdo facendo Camiño, que conxuga o fomento do baloncesto base coa promoción de distintas rutas xacobeas ao seu paso pola provincia de Lugo.
A primeira fase do proxecto terá como protagonista ao equipo júnior masculino do Ensino, recentemente clasificado para o Campionato de España que se disputará en Granada, e que actuará como embaixador do Xacobeo lucindo o logo nas súas camisetas de quecemento e nos rótulos das furgonetas nas que se desprazarán á cidade andaluza. Previamente, na fin de semana do 26 e 27 de xuño, teñen previsto visitar os concellos de Pedrafita do Cebreiro, Triacastela, Sarria, Portomarín e Palas de Rei para gravar un vídeo promocional do Camiño Francés que difundirán a través das redes sociais.
A segunda fase desenvolverase en Burela entre o 19 e o 23 de xullo e inclúe xornadas de adestramento nas que participarán xogadoras profesionais do club e 42 rapazas da canteira, xunto con accións para divulgar o Camiño Norte ao seu paso polos concellos da Mariña.
Por último, para o mes de setembro está previsto un torneo de baloncesto itinerante que se desenvolverá en varias localidades do Camiño Primitivo e finalizará en Lugo. Vai dirixido aos nenos e nenas máis cativos e contará con catro equipos masculinos e femininos.
