A portavoz municipal de Cs, Olga Louzao instou á alcaldesa, Lara Méndez, “a abrir un período de reflexión, recoñecer as críticas e enmendar os numerosos erros na execución do proxecto do carril bici”. “Cando se anunciou esta obra como gran elemento transformador da cidade xa advertimos que a concepción do proxecto responde a formulacións de mobilidade actualmente obsoletos. Cando a gran maioría das cidades europeas de todos os tamaños apostan na actualidade pola convivencia de vehículos de propulsión coas bicicletas nas mesmas vías no trazado urbano, Méndez decidiuse por unha solución que fracasou non en poucas ocasións”, advertiu a concelleira da formación laranxa.
“No desenvolvemento das obras de creación do novo carril bicicleta existe unha serie de carencias que non están a ser solucionadas durante a execución dos traballos. Sen ir máis lonxe, na rúa Marqués de Ombreiro un estreitamento da vía por culpa dun edificio que non se atopa aliñado co resto das edificacións provocou que durante os traballos de pintado do carril bici se optara pola opción máis chafalleira”, sinalou Louzao.
“En moitos puntos xa executados como Rolda do Carme ou Marqués de Ombreiro o carril termina abruptamente contra a beirarrúa coincidindo coa intersección doutras rúas. Esta mala execución supón unha falta de seguridade galopante e constituirá por si soa un factor que conduza este proxecto ao fracaso irremediable e senón, ao tempo” engadiu.
“Na rúa Xermán Alonso Hortas está previsto habilitar este carril na marxe esquerda da vía. Con todo existen árbores neste lado da rúa. Que pensa facer o Goberno local, eliminalos ou improvisar como en Marqués de Ombreiro? Na intersección da Fonte dos Ranchos coa Rolda do Carme o carril bici si conta con ancho necesario. Con todo, a manobra de incorporación dos vehículos á Rolda do Carme é perigosa polo peralte do tramo que reduce a visibilidade. É outro problema non abordado. Non podemos esquecer ademais que en varias rúas afectadas por este novo carril bici, os contedores ocupan aínda o carril”, defendeu Cidadáns.
Oportunidade histórica perdida
“O último proxecto similar executado en Galicia foi na Coruña, onde anos despois da súa implementación rexistra moi pouco uso. Non debemos esquecer que en Lugo, hai décadas, tentouse un proxecto similar na zona sur que pretendía comunicar as vías de Ramón Ferreiro e avenida de Madrid co carril da segunda rolda de Fingoi e foi un soado fracaso que apenas chegou ao ano de vida. O Goberno local debe emendar os numerosos erros de planificación e execución nesta maiúscula chapuza para tentar salvar o proxecto e evitar que eses dous millóns se convertan nunha nova oportunidade histórica perdida”, concluíu.
