A ADC Sagrado Corazón contará cunha nova incorporación ao grupo de traballo de técnicos para a próxima campaña que se unirá ao xa existente nesta tempada á que lle restan dúas semanas para chegar á súa conclusión. Así, Adrián Vázquez será o novo coordinador deportivo do club relevando no posto a Brais Rozados que comunicou á Directiva hai dous meses que non podería seguir compaxinando as súas funcións como máximo responsable da área deportiva que veu exercendo esta campaña, aínda que si seguirá ligado ao club dirixindo como primeiro adestrador a dous equipos.
Adrián Vázquez acumula unha ampla experiencia tanto como adestrador como coordinador xa que militou en Escolas como a da SD Monterroso, SD Antas, SDC Polvorín ou Pontevedra CF, ademais de adestrar a equipos senior en Preferente ou Primeira Galicia (SD Monterroso, SD Antas, Laracha CF e SD Chantada) ou ser preparador físico no CD As Pontes e Cerceda (3ª división). Actualmente dirixe as seccións de fútbol e fútbol sala do CP Maristas, labor que seguirá desenvolvendo no futuro e que lle permitirá compatibilizar con este posto dentro do Sagrado Corazón.
O técnico lucense conta co título de adestrador nacional de Fútbol Nivel I, II e III, é licenciado en Ciencias da Actividade Física e do Deporte, e conta co Máster Universitario de Preparación Física pola RFEF. Ademais, é formador de adestradores na Escola Galega de Adestradores da RFGF desde o 2016.
Chegada ao Sagrado
Adrián Vázquez será primeiro adestrador dun dos equipos da Escola, así como preparador físico dos equipos de fútbol-11, ademais de ocuparse da readaptación de lesionados. Dirixirá o actual grupo de técnicos cos que conta o club, os cales seguirán a próxima tempada, e será o encargado de desenvolver a metodoloxía de traballo, entre outras funcións.
