Tres festivais musicais que se celebran na provincia de Lugo entran dentro da marca FEST Galicia, que foi presentada onte como patrocinador de 13 citas culturais similares baixo o lema Un destino musical seguro, no marco da celebración do Xacobeo 21-22.
Esta medida dá continuidade a iniciativa posta en marcha hai catro anos para promover unha serie de eventos caracterizados pola calidade das súas propostas e a profesionalidade na súa organización, ademais de por achegar valores engadidos á experiencia musical relacionados co turismo, o medio ambiente, a cultura, o patrimonio e a concienciación social.
Os eventos da provincia adheridos a esta iniciativa, a partir da convocatoria publicada o pasado mes de xuño, son Caudal Fest en Lugo, Resurrection Fest en Viveiro e 7º Ribeira Sacra Festival en Chantada, Monforte de Lemos e Sober.
O resto de festivais galegos adscritos son: Atlantic Fest en Vilagarcía de Arousa, Festival de la Luz en Boimorto, Maré Compostela, PortAmérica en Caldas de Reis, Revenidas en Vilagarcía, 1 Sinsal Son Estrella Galicia na illa de San Simón (Redondela), SonRías Baixas en Bueu, Underfest en Vigo, Vive Nigrán e WOS Festival x Son Estrella Galicia en Santiago de Compostela.
Aumento do 25% respecto a 2020
Ademais, FEST Galicia refórzase este ano cun aumento da súa dotación económica nun 25% respecto a 2020 co obxectivo de contribuír á recuperación dun sector moi afectado pola crise sanitaria no marco do Plan de reactivación para o sector cultural. Neste mesmo sentido, a Xunta retomou este ano a convocatoria específica de subvencións a festivais de música, suspendida en 2020 ante a imposibilidade de levar a cabo os eventos nos seus formatos habituais. Esta liña de axudas, actualmente en proceso de tramitación cara á súa próxima adxudicación, distribuirá outros 340.000 euros entre os encontros beneficiarios, polo que a inversión total polas dúas canles se sitúa nos 840.000 euros.
Para a adhesión á marca dos devanditos 13 festivais tívose en conta tanto a súa traxectoria e a calidade das súas propostas artísticas e actividades paralelas, como a súa implicación cos territorios nos que se celebran e as boas prácticas empresariais. As medidas para a redución do seu impacto medioambiental e para avanzar na igualdade, así como o seu compromiso cos artistas e grupos galegos, foron tamén elementos determinantes nesta selección.
