Skip to main content
Lugo

Celébrase unha xornada sobre recusos micolóxicos no campus de Lugo

Por 27 Xullo, 2021Sin comentarios

Este mércores 28 de xullo na Escola Politécnica Superior de Enxeñaría do campus de Lugo celebrarase unha xornada na que se debaterá e serán obxecto de análise as potencialidades dos recursos micolóxicos como activos forestais non madeireiros, a mellora da súa xestión económica e potenciación da estrutura produtiva.

Esta xornada, organizada polo grupo nacional Xestión dinámica innovadora dos recursos micolóxicos (Mikogest), investigadores, produtores e empresas debaterán sobre futuras iniciativas orientadas a valorizar un sector que en Galicia xa comeza a ser importante, aínda que podería ata triplicar a súa actual repercusión, segundo apunta o catedrático da USC Antonio Rigueiro.

A xornada Go Mikogest programada na sede universitaria luguesa servirá para coñecer diversas propostas para mellorar o aproveitamento destes recursos naturais a través dunha xestión dinámica e eficaz de sistemas de regulación da recolección, o que permitiría a todos os propietarios de montes ou terreos produtores desenvolver unha actividade sustentable e á vez eficiente e capaz de proporcionar moito máis valor engadido.

Programa das xornadas

A vicerreitora de Coordinación do Campus de Lugo, Montserrat Valcárcel; o director da Escola Politécnica Superior de Enxeñaría da USC, Tomás Cuesta, e o xefe da área forestal da Cesefor, Roberto Rubio, inaugurarán, ás 9.30 horas, no salón de actos da EPSE, as xornadas técnicas e divulgativas, cuxa quenda de relatorios programadas se desenvolverá en sesión matinal. As persoas interesadas en participar nas xornadas, xa de xeito presencial ou telemático, poden formalizar a súa inscrición na web www.mikogest.net.