Celebrarase nas propias instalacións provinciais de Castro Ribeiras de Lea, a partir das 10.00h. As persoas interesadas no procedemento poden consultar toda a información no Boletín Oficial da Provincia do día 20.
A Deputación de Lugo celebrará o vindeiro venres, 30 de xullo, a partir das 10.00 horas, unha poxa pública de 55 cabezas de gando bovino das razas frisoa e cachena da Granxa Gayoso Castro. A institución provincial venderá 28 frisoas e 27 cachenas a través deste procedemento de concorrencia, que terá lugar nas propias instalacións da Granxa, en Castro Ribeiras de Lea.
A poxa será en vivo, a man alzada, e á alza ou ascendente, de xeito que comezará por un prezo de saída que se irá incrementando a través de sucesivas poxas, en tramos de 10€, ata que quede un único participante, ao que se adxudicará o exemplar interesado ao prezo de remate ou prezo da última poxa realizada polo mellor ofertante. Por tanto, este será o custe que terá que pagar o comprador, excluíndo os impostos pertinentes e os gastos de transporte ou doutra índole. Poxarase en cada momento e de xeito individualizado polo exemplar que se estea licitando.
O prezos de saída varían en función das características dos exemplares. O prezo de saída máis baixo será de 105€ e o máis alto, de 705€.
A oferta económica presentada consistirá unicamente en diñeiro en metálico e non se admitirá aprazamento no pago, que se fará efectivo mediante ingreso do prezo na Tesourería provincial.
As persoas interesadas poden consultar toda a información sobre a poxa no Boletín Oficial da Provincia (BOP) do día 20 de xullo, que recolle as bases que rexen o procedemento, que foi aprobado pola Xunta de Goberno na sesión do día 16 de xullo.
Mediante a Granxa Gayoso Castro e os diferentes proxectos de investigación e recría de raza autóctona, a Deputación de Lugo impulsa o sector primario da provincia, dende unha visión global e estratéxica do territorio e dende o coñecemento da súa realidade e oportunidades.
