Os veciños de Muras están convocados mañá, venres 16 de xullo, ás 13.00 horas, a unha manifestación diante da oficina de Abanca para protestar en contra do inminente peche da mesma.
O peche de Abanca en Muras é un máis dos moitos que están a realizar por toda a provincia de Lugo e que están a xerar numerosas protestas por parte da veciñanza, xa que estas medidas son consideradas como un perxuízo á contorna rural.
Baixo o lema Non ao peche! e Non á desaparición do rural! súmanse toda a poboación e convidan a todos a asistir a dita concentración.
DEBATE A NIVEL GALEGO
Antes esta situación os PSOE galego por medio do seu voceiro, Juan Carlos Francisco, esixiulle á Xunta que “acaden unha solución política” a través do diálogo para “meter en cintura” ás entidades bancarias que operan en Galicia e frear a exclusión financeira dos concellos galegos. Francisco presentou unha pregunta oral neste sentido no Pleno do Parlamento.
O responsable socialista lembrou o peche de 1.000 oficinas bancarias dende 2008, deixando a 45 concellos galegos sen ningunha delegación e outros 118 concellos que só teñen unha oficina bancaria, ás que se suma o anuncio de Abanca de pechar as oficinas de Cerdido, Carballedo, Cerdedo – Cotobade, Soutelo de Montes ou Seixo –Marín-.
Francisco criticou que estas entidades empreguen diñeiro público que está a ser inxectado polo goberno galego para manter caixeiros en realidade para “maximizar beneficios”, porque “se seguen a pechar oficinas a solución non será que a Xunta de Galicia siga a poñer diñeiro público”. Ademais, lembrou que se trata de entidades que veñen de ser rescatadas por inxentes cantidades de diñeiro público para despois ser vendidas.
O parlamentario socialista salientou que o proceso de dixitalización da banca no debe supoñer un “prexuízo evidente para a xente maior ou con menos recursos” para empregar estes sistemas atópanse con “máis dificultades para acceder a un servizo básico como é o financeiro e acadar diñeiro en efectivo”.
CONTESTACIÓN DO GOBERNO
Pola súa banda, O conselleiro de Facenda e Administración Pública, Valeriano Martínez, explicou a iniciativa posta en marcha pola Xunta de Galicia para instalar caixeiros e prestar servizos de asesoramento financeiro nos concellos do rural.
Durante a súa intervención no Pleno do Cámara galega para responder a unha pregunta oral sobre servizos financeiros, defendeu que esta iniciativa busca, ademais da instalación de caixeiros, a prestación dos servizos de asistencia e formación financeira. Neste sentido, Valeriano Martínez sinalou que Galicia conta cunha das iniciativas máis ambiciosas do Estado para evitar a exclusión financeira no ámbito rural.
Ademais, o conselleiro subliñou que un total de 34 concellos asinaron xa os convenios de colaboración coa Xunta para dispoñer de caixeiro automático e de servizos de atención financeira ao cidadán dos que se beneficiarán preto das 48.000 galegas e galegos que viven nestes municipios. “Trátase de facer política útil para dar solución aos problemas que teñen os cidadáns”, subliñou.
A medida posta en marcha polo Goberno galego está baseada en tres liñas de actuación: a instalación de caixeiros automáticos nas dependencias municipais; a prestación dun servizo de asistencia financeira que permita, de xeito semellante a unha oficina bancaria convencional, solucionar de xeito presencial as dúbidas; e unha oferta de formación financeira e banca electrónica para adquirir nocións básicas e aprender a utilizar os servizos bancarios a través das novas tecnoloxías.
Finalmente, o conselleiro de Facenda e Administración Pública sinalou que, en todo caso, o problema da exclusión financeira ten unha dimensión nacional que require dunha actuación global e coordinada por parte do Goberno de España.
