O Concello de Lugo ofreceu unha recepción oficial a Adiaratou Iglesias para trasladarlle os parabéns polos seus logros nos Xogos Paralímpicos de Tokio. “Agradezo que co teu esforzo leves o nome da nosa cidade ata o máis alto tanto a nivel nacional coma internacional”, destacou a rexedora.
Ao acto asistiu tamén Adolfo Vila, adestrador de Iglesias, así como familiares e amigos da atleta.
“É un orgullo para a cidade contar mulleres ca valentía, constancia e esforzo que demostras e agora novamente ten o seu recoñecemento convertido nun ouro e unha prata nestes Xogos Olimpicos de Tokio. Un logro que as e os veciños recibimos con moita satisfacción”, destacaron dende o Concello
Adiaratou Iglesias converteuse en dobre campioa absoluta de atletismo en Galicia en 100 e 200 metros fronte a atletas sen discapacidade. Non puido ir ao Europeo paralímpico de Berlín en 2018 porque os papeis da súa nacionalización non chegaron a tempo, pero si ao Mundial de Dubai en 2019, de onde regresou con dúas pratas (100 e 200 metros).
Proclamouse bicampioa de Europa en 100 e 400. No tartán do Estadio Olímpico de Tokio confirmouse como unha das mellores deportistas españolas acadando o ouro en 100 metros e a prata en 400 metros.
