Hoxe foron entregados os diplomas aos 20 alumnos participantes no obradoiro dual de emprego Cumes da Terra Chá IV, compartido polos concellos de Friol, Begonte e Rábade.
A Consellería de Emprego e Igualdade leva destinados 694.000 euros en dous anos a fomentar o emprego nestes municipios a través de senllos obradoiros. En outubro comezará unha nova edición desta iniciativa, que ofrecerá oportunidades laborais a outras 20 persoas desempregadas.
Ademais, ambos talleres, o que finaliza e o novo, inclúen a posibilidade de contratar a todos os alumnos-traballadores en empresas da zona por un mínimo de tres meses a xornada completa unha vez transcorrido o período de formación. Con ese obxectivo, a Xunta concede incentivos á contratación.
O obradoiro que agora remata impartiu os módulos de Pavimentos e albanelería de urbanización e Operacións de formigón, con seis alumnos; e Operacións auxiliares de acabados ríxidos e urbanización, con catorce inscritos.
O traballo desenvolto por este obradoiro centrouse na cuarta fase da dotación de beirarrúas na marxe esquerda da estrada LU-231 no treito urbano de Friol; a pavimentación de rúas no barrio da Ponte de Rábade e o acondicionamento dun edificio municipal situado na praza Irmáns Souto Montenegro de Begonte, así como a execución de melloras na avenida Terra Chá de Baamonde.