Skip to main content
Ribadeo

Concertos, teatro, monicreques e exposicións conforman a axenda de Ribadeo

Por 9 Outubro, 2021Sin comentarios

Concertos, teatro, monicreques e exposicións conforman a axenda cultural do último trimestre do ano en Ribadeo.

Comezou o mes de outubro coa 18 edición da Mostra de Teatro Afeccionado Daniel Cortezón. A través del terase a ocasión de ver este sábado ás 20.00 horas no auditorio municipal Intocables, de Adosado Teatroa e Pentación. Ademais a prestixiosa Illana Producciones representa Maestrissimo o 31 de outubro e Txalo Produkzioak traerá Juntos o 27 de novembro. Os lucenses Itaca Teatro farán dúas funcións de Formigas no peto e logo de moito tempo estará en Ribadeo a compañía do nome por excelencia na historia dos títeres galegos, Marcelino de Santiago (Kukas) que trae para grandes e pequenos Don Gaiferos o 24 de outubro.

No eido dos monicreques, Mircromina Títeres traerán ao auditorio o 17 deste mes de outubro Cousas de casa. Tamén para nenas e nenos Galitoon representa a súa exitosa The show Moscón o 7 de novembro. O ciclo O Concello cos coles convida os centros de ensino a ver por unha banda a importante exposición de restos arqueolóxicos do fondo da ría de Ribadeo O porto de Ribadeo. Testemuñas do pasado  e pola outra Os vikingos de Playmóbil desembarcan en Ribadeo. En colaboración con Aeslic e tamén coa área de Cultura do Concello de Lugo que emprestaron as vitrinas estamos seguras de que esta iniciativa que estará na oficina de Turismo de Ribadeo a partir do 25 de outubro suscitará moita ilusión en público de todas as idades.

Através de O Concello cos coles, aínda que nesta ocasión dirixida máis ben a secundaria e bacharelato poderemos gozar da posta en escena de Poeta en Nova York, da compañía Paloma Lugilde Producións.

Dentro da proposta expositiva retoman os retratos femininos en acuarela da artista murciana Esther Páez. Poderá visitarse a partir do vindeiro luns, 11 de outubro, en horario de apertura da oficina de Cultura na Casa do Viejo Pancho. Este edificio volve ser espazo expositivo e de presentacións. A Agrupación Cultural Francisco Lanza organiza neste mes de outubro a do primeiro dicionario do galego de Asturias e a de dúas obras de Xulio Pardo de Neyra.

As asociacións culturais do Concello desenvolven un importante labor, tamén colaborando na nosa programación.

No ciclo de actividades nas parroquias haberá unha actuación de Illa Pancha en Remourelle, Os Misturos en Arante e as pandereteiras de Amigos da Gaita en Cedofeita e nas Anzas. A Coral Polifónica de Ribadeo vai tamén a San Pedro de Arante co gallo do seu concerto de Santa Cilla e tamén organizará xa no Nadal o Festival de Panxoliñas. A Banda Municipal de Música tamén celebrará Santa Cilla e a maiores o concerto de Aquí como en Viena.

Haberá unha master class e o concerto posterior que o pianista de jazz Abe Rábade ofrecerá en Ribadeo a través da asociación Bruar. Será o 30 de outubro. A programación de música complétase coa actuación de homenaxe a Astor Piazzola con Malajunta Tango Dúo e con De Botóns.

Chegará tamén á sétima edición do Festival de Jazz & Blues de Ribadeo, cunha programación que será obxecto dunha presentación propia. E rematan cun convite para o vindeiro sábado, 16 de outubro, ás 20.30 horas no auditorio municipal. A cantante de fados María do Ceo actúa en Ribadeo no que se prevé que sexa unha cita moi concorrida en canto a público, co-organizada xunto co Ribadeo Fútbol Club.