O Concello de Cospeito presentou unha nova edición, a vixésimo quinta, das escolas deportivas municipais, tras un curso de parón pola covid-19. O prazo de inscrición xa está aberto e finaliza o próximo 8 de outubro.
As disciplinas ofertadas son as mesmas de anos anteriores, aínda que as máis demandadas en pasadas edicións foron fútbol sala, natación, ximnasia rítmica, tenis de mesa e patinaxe. Tanto estas como outras como baloncesto, atletismo, bádminton ou calquera que poida interesar impartiranse a condición de que exista un mínimo de alumnos.
No caso do fútbol sala, haberá que indicar a categoría na que se inscribe e no de natación, que se impartirá na piscina da Pastoriza, a quenda: luns de 19.15 a 20.00 horas ou xoves de 18.30 a 19.15.
O Concello lembra que durante este curso tomaranse as debidas medidas de seguridade sanitaria adaptadas á normativa para retomar as actividades.
