O Viveiro CF anunciou o novo adestrador do equipo, que será David Páez, que se incorpora xunto a Héctor como preparador físico.
A función do novo adestrador será levantar ao equipo da zona baixa da táboa na que se atopa tras nove xornada de competición en Terceira. O equipo celeste conta con 6 puntos duha vitoria e tres empates. A parte negativa da tempada ata o momento son as 5 derrotas no seu haber, que o sitúan catro puntos por riba do pechacancelas.
Páez incorpórase ao equipo tras a dimisión de Chusky, comunicada aos siareiros a través das redes sociais. Nela explicábase que “decidiu dar por finalizada a súa actual etapa como adestrador do noso club. É tempo agora de respectar a súa decisión e mostrarlle o noso agradecemento pola súa profesionalidade, dedicación e paixón en todos estes anos e polo que representa a súa figura para o Viveiro CF”.
Engaden que “Chusky é e será un dos grandes mitos do Viveiro CF, e a súa lenda vai máis aló do que foi como adestrador e xogador do noso club. O Viveiro CF quere agradecer tamén a achega de Chusky ao engradecimiento da institución e deséxalle o mellor na súa vida persoal e profesional. El sabe que está no corazón do club e que este, o Viveiro CF, será sempre a súa casa”.
