Este domingo 21 de novembro, continuando co programa de roteiros As nosas sagradas montañas, Adega organiza unha pola Serra da Cova da Serpe, para coñecer algunhas das lendas que orixinou a cova, situada na confluencia dos Concellos de Friol, Guitiriz e Sobrado, e que estivo a piques de desaparecer “coa dinamita eólica”.
Comezará no Camiño de Santiago Norte, preto da aldea A Pena Branca, dende onde se subirá ao alto para acadar as pistas forestais e dos parque eólicos, paralelas á liña dos cumios da Serra da Cova da Serpe ata chegar ata a Cova, orixe de moitas lendas.
Seguirán o trazado das pistas, ata dar coas aldeas da contorna da parroquia das Negradas, val que se pecha entre os montes desta parte da Serra. Collerán novamente o Camiño Norte, e outra vez a estrada que os levou ata Pena Branca, pero agora preto de Mariz, pasando polo Vilar.
A dificultade desta andaina e media/baixa, tendo en conta que a primeira subida, dende A Pena Branca e o cumio da serra ten unha forte pendente (coincidindo co paso do Camiño de Lugo á Coruña).
Esta ruta é un exemplo da paisaxe rural da Dorsal galega, na contorna da Serra do Cordal de Montouto, Serra da Loba, da Chaira, Guitiriz, a Braña do Boedo (unha das maiores brañas da Península e totalmente descoñecida). Tamén poderase observar Paporroibo, Miñato, Pombo, acivros, carballos, castiñeiros e bidueiros.
O guía aconsella levar chaleco, botas ou calzado forte, bastón, mochila, chuvasqueiro, roupa de abrigo e repouso, auga e comida (xa que haberá xantar polo medio da ruta).
Esta actividade pode ser axeitada para rapazas e rapaces de máis de 10 anos con experiencia en sendeirismo. A distancia aproximada é de 9-12 quilómettros.
Este roteiro faise en colaboración cos colectivos Xermolos e Lareira de Soños.
Para participar no roteiro é necesario inscribirse antes do venres 19 de novembro a través do formulario https://roteirosadegalugo.wordpress.com/reserva/, cubriranse as prazas por orde de inscrición. Toda a información na bitácora dos roteiros https://roteirosadegalugo.wordpress.com/ e www.adega.gal ou chamando ao 982240299.