Os traballadore de Vestas recibiron na mañá de onte as cartas de despedimento nas que se lles informa dos quince días de prazo ante a previsión de pechar as portas a finais deste mes de decembro.
Así mesmo, a empresa danesa está a ingresar xa os finiquitos coas indemnizacións de 28 días por ano traballado e cun máximo de doce mensualidades, tal e como recolle o expediente de regulación de emprego.
O día 9 a conselleira de Emprego e Igualdade, María Jesús Lorenzana, destacaba na mesa industrial que a Xunta ten identificado tres posibles compradores para a factoría de Viveiro.
Na reunión, a Xunta e os sindicatos solicitaron á empresa que os despedimentos non se fixeron efectivos o 31 de decembro e que, polo tanto, non se peche a factoría para evitar que se dificulte un posible proceso de venda. “É fundamental para continuar coas conversas que se poida adquirir unha factoría que estea funcionando, unha unidade produtiva, e non un activo inmobiliario”, explicou Lorenzana.
A titular de Emprego e Igualdade lamentou que a empresa se negara “en rotundo” a ampliar o prazo para levar a cabo os despedimentos e amosou a súa “preocupación” por que se poida frustrar unha posible venda “pola pouca marxe temporal que hai ata o próximo 31 de decembro”.