Skip to main content
Foz

O PP de Foz pide ao Concello adquirir unha parcela para ampliar o centro de saúde

Por 3 Decembro, 2021Sin comentarios

A corporación municipal instou ao Goberno de Foz no último Pleno celebrado onte a que nos próximos orzamentos do Concello inclúa unha partida para comprar os terreos  situados entre o centro de saúde e o colexio O Cantel para ampliar o centro de saúde, un proxecto do que xa informou o Sergas dentro do Plan de Infraestruturas Sanitarias. A  moción popular foi aprobada cos votos do Partido Popular  e a abstención do resto dos grupos.

O portavoz popular, Javier Castiñeira, sinala: “O acordo insta ao goberno a que merque  eses terreos no 2022 e os poña a disposición da Xunta para que poida facer a obra na segunda parte da lexislatura, é dicir, nos anos 23 e 24, posto que está na fase dous dese plan. A ampliación suporá unha nova base para o 061 e ampliar certas salas do centro de saúde actual; dotar con unha sala mellor para pediatría, outra mellor para triaxe e urxencias, despachos novos e espazo para almacenaxe. É necesario comprar eses terreos, iniciar o proceso e necesitamos o ano 2022, non podemos durmirnos”. 

Castiñeira sinala: “Estamos contentos por seguir este proceso que iniciamos no seu momento, cando gobernabamos; gracias a aprobar o PXOM, esa parcela permite esa construción. Hai que lembrar que a parcela do centro de saúde está totalmente esgotada e precísase ampliar. Esperemos que o goberno cumpra este mandato da corporación municipal”.