Lugo Monumental rexistrou no día de onte dous escritos dirixidos ao Delegado Territorial da Xunta de Galicia en Lugo e a Alcaldesa de Lugo no que solicita novamente que se preste atención á sinalización do noso patrimonio cultural.
Cando se fai o percorrido desde Madrid a Galicia pódense observar sinais turísticos que informan aos condutores de que existe un acueduto romano en Segovia a escasos quilómetros da autovía A6. Este sinal, cos logotipos da Junta de Castilla y León e Iberpistas, sinaliza ese destino e permite ao condutor realizar unha parada turística que doutra maneira quizais non faría. Son paradas equiparables ao consumo de “compra por impulso” que pode ser unha das claves para aumentar o número de visitantes á cidade. Con todo, nada sinaliza que Lugo conta con tres bens Patrimonio da Humanidade. Os nosos principais atractivos non están sinalizados da forma que se merecen e desde a asociación Lugo Monumental expúxose este tema en varias ocasións desde 2014.
Lugo Monumental propuxo esta sinalización xa en 2014, insistindo en anos posteriores sen que ata o momento atendeuse a petición, algo dificilmente explicable xa que se trata dunha publicidade sinxela, efectiva e barata, que é incomprensible que non estea executada.
