Continuando coa programación de Nadal organizada polo Concello de Sarria. Mañá mércores 29 de decembro terá lugar na casa da cultura Rúas de Sarria. Pasado, presente e futuro unha conferencia e posterior faladoiro con Xaime Félix López Arias.
XAIME FÉLIX LÓPEZ ARIAS
É profesor de Ensinanzas primarias con dedicación á educación de adultos e graduado social, licenciouse en Dereito no ano 1978 e, na actualidade, é profesor no Instituto de Ensinanza Secundaria Gregorio Fernández, onde dirixe un curso de Historia Comarca e exerce a avogacía en Sarria.
Recibiu o premio de relato Meigas e Tragas, a Camelia de Ouro en Vilagarcía e Convivio de Guimaraes.
Foi autor dos seguintes libros: As augas toldas, Cuco Rei, Sarria, Santa María Madalena de Sarria, O Trasno da Cervela e A primeira Deputación de Lugo. Tamén se encargou de promover o Arquivo Comarcal de Sarria e as asociacións culturais Arcas e Irmandade Sarria-Guerledan. Publicou numerosos traballos de investigación histórica no Boletín do Museo Provincial de Lugo, no Boletín do Seminario de Estudos Sarrianos e na revista Seurros, todos eles relacionados coas súas investigacións sobre a comarca de Sarria tanto sobre asuntos históricos como etnográficos.
A súa carreira de investigación e divulgación de Sarria continúa coa súa participación nas publicacións O Tamborileiro, Casa Grande de Sarria e nos libros-programa das Festas de San Xoán con artigos de temática histórica.