A central térmica de Endesa nas Pontes recibe estes días outro cargamento en barco de 77.000 toneladas de carbón tras a reactivación da actividade pola crise enerxética. As previsións son que chegue o sábado ao porto exterior de Ferrol, desde onde será transportado en camión ás Pontes.
Trátase do terceiro buque que leva mineral á térmica este outono ao retomarse a súa actividade a semana pasada. Así, se desestibará o carbón na terminal que a empresa eléctrica ten en Ferrol para, posteriormente, ser enviado por estrada ata o parque de carbóns situado no propio complexo enerxético. As dúas embarcacións anteriores chegaron a finais de outubro e mediados de novembro.
As instalacións de Endesa contaban cunhas 40.000 toneladas previas a estes tres envíos, que levan á central 80.000, 20.000 e 77.000 toneladas, respectivamente, o que fai un total de 217.000 toneladas a disposición para a súa combustión.
A térmica reactivouse parcialmente o pasado 22 de novembro nun dos catro grupos de xeradores ante o contexto de auxe de prezos da electricidade e as baixadas de temperaturas, que provocan un aumento do consumo enerxético. A planta, en proceso de peche desde finais do ano 2019, levaba meses sen estar operativa.
Os sindicatos CIG, CCOO e UXT reclamaron a Endesa que dea garantías de continuidade da actividade de produción da central en 2022.
