Representantes da Plataforma Sanitaria da Mariña mantiveron unha reunión no Concello de Viveiro coa alcaldesa, María Loureiro. Dito encontro foi solicitado a este colectivo desde a Alcaldía , para tratar en profundidade da situación límite que vive o Centro de Saúde de Viveiro, con días no que un so facultativo estivo a atender a totalidade da vila de preto de dezaseis mil habitantes.
Nesta reunión a alcaldesa de Viveiro trasladou a súa preocupación pola deriva que está a tomar a asistencia sanitaria na localidade e mesmo falou tamén das derivacións que se están a dar tamén desde o PAC ao servizo de urxencias do Hospital da Mariña, sen previa valoración, debido á enorme presión asistencial que están a sufrir por falta de profesionais, así como tamén das eivas dun servizo de atención telefónica sobresaturado ou da xestión ineficaz nos trámites das baixas por covid.
Desde o colectivo sanitario “trasladamos á alcaldesa a nosa preocupación polo desmantelamento que está a sufrir a Atención Primaria na comarca, agravada pola pandemia e a sexta onda, máis xa evidente e progresiva desde o ano 2010. Coincidimos na necesidade de que colectivos, veciños e responsables políticos e sindicais da comarca aunemos forzas para defender a nosa Atención Primaria, pois camiña cara ao caos máis absoluto”- conclúe Montse Porteiro, coordinadora da Plataforma Sanitaria