O concelleiro de Ciudadanos Juan Vidal-Pardo anunciou esta mañá que o seu grupo propoñerá ao pleno unha proposición que ten por obxectivo poñer en marcha de forma urxente un Plan municipal de convivencia como consecuencia das problemáticas derivadas das ocupacións efectivas de vivenda e polos intentos frustrados de ocupar. “Ao longo do mandato, tanto PSOE como BNG negaron a existencia dun problema coa ocupación e tacháronnos de alarmistas cada vez que abordamos este asunto. Con todo a realidade na rúa demostra que existe unha preocupación entre os veciños de moitos barrios como A Milagrosa, Sagrado Corazón, As Gándaras, Montirón, Fingoi ou A Campiña polos continuos casos de intentos de ocupación. Hai zonas na cidade nos que os seus veciños organizaron sistemas de alerta a través de chats de whatsaap para evitar que entren nas vivendas”, sinalou o concelleiro da formación laranxa.
Vidal-Pardo anunciou que este Plan Municipal de convivencia inclúe medidas concretas que non supoñen un incremento do gasto municipal, senón que a súa viabilidade reside na optimización de recursos municipais. “Trátase dunha cuestión de vontade política. Vemos moi necesario crear un servizo específico ao que poidan acudir propietarios e posibles veciños afectados por problemas de convivencia, a partir do cal se active un sistema de seguimento dos casos denunciados ata a resolución definitiva dos mesmos. Tamén é básico dar asesoramento aos veciños que sofren a ocupación de propiedades e, así mesmo, no seu caso, para os ocupantes ilegais acerca das eventuais solucións habitacionais. Consideramos primordial elaborar unha listaxe das zonas e inmobles máis susceptibles de ocupación, así como o reforzo da seguridade e a vixilancia nas mesmas”, sinalou Vidal-Pardo quen informou de que a súa proposta inclúe un protocolo para coordinarse coa Xunta de Galicia que persegue asegurar a devolución dos inmobles no menor tempo posible, así como potenciar a coordinación e a cooperación institucional entre a Policía Municipal, Policía Nacional e a Policía Autonómica.
O concelleiro de Cs confía en que a presión veciñal e do tecido asociativo faga cambiar de idea ao PSOE quen en marzo de 2020 votou no Pleno en contra dunha iniciativa do partido laranxa que perseguía obxectivos similares. “O Goberno chega tarde a este problema. É necesario que aborde esta situación deixando ao carón o rumbo ideolóxico que esta práctica ilegal esperta en partidos como o BNG. A ocupación está aí e hai que evitar que deteriore a convivencia e reste calidade de vida ás zonas máis desfavorecidas da cidade. É necesario achegar á cidadanía un apoio moi necesario nestes momentos pola realidade social que se vive nos barrios, ante o que, desgraciadamente ata o de agora, o PSOE e o BNG decidiron poñerse de lado. Escúdanse en números, pero esquecen todos os problemas xerados polos intentos de ocupación errados e o medo que xeran”, sinalou.
Distintas casuísticas, diferente trato
O concelleiro de Cs considera que se debe realizar un traballo pedagóxico sobre este asunto. “É necesario distinguir entre as distintas casuísticas. Por unha banda están os supostos de desafiuzamento en situacións de necesidade e vulnerabilidade ou motivados por execucións hipotecarias; e, por outro, aqueles en os que se inclúen as ocupacións ilegais. Ambos supoñen, en efecto, unha privación do dereito da propiedade, pero, mentres que as vítimas de desafiuzamentos merecen toda a nosa protección na medida do legalmente posible, as ocupacións ilegais de vivendas, ao contrario, merecen todo noso reproche e en necesario minimizar o seu efecto para que non se deteriore a convivencia nos nosos barrios”, concluíu o edil.
