En Galicia, máis de 700.000 hectáreas, corresponde a monte veciñal en man común, xestionado por 2800 comunidades de montes. Isto demostra que esta figura ten un claro indicador económico e produtivo.
É necesario recoñecer a achega do monte veciñal na vertente social, económica e ambiental. Dada a necesidade que ten a valorización do monte como elemento de creación de emprego e de xeración de riqueza, o Goberno galego quere ser un aliado das comunidades de montes á hora de conseguir esa visibilidade social e tamén unha maior conciencia na cidadanía sobre a necesidade de poñer a producir os nosos bosques.
O monte veciñal debe ser un dos principais motores do emprego local , o obxectivo é mellorar a explotación forestal e da biomasa, e tamén compatibilizar cos usos do aproveitamento gandeiro (mediante proxectos silvopastoriles), producir cogomelos, castañas ou outro tipo de froitos do bosque e potenciar zonas recreativas e roteiros de sendeirismo que profunden no coñecemento do noso contorno, á parte de programas de educación ambiental dirixidos aos máis pequenos.
Neste senso, a comunidade de montes veciñais en man común de Toca, pertencente á parroquia de Renche en Samos, requiriu á Confederación Hidrográfica Miño-Sil (CHMS) a repoboación de árbores con 4.000 exemplares.
Dende a mancomunidade solicitan a plantación de cereixos, castaños e bidueiros tanto na marxe esquerda como dereita do río Ferreiro e Rego de Valcorveiro.
O monte comunal de Toca xa sofreu unha plantación de máis de 100 árbores levadas a cabo por escolares despois de que a zona fose afectada por un incendio no mes de outubro do ano 2017.
