Adxudicadas as obras de rehabilitación da Casa dos Ulloa situada na Rúa Maior de Sarria. Esta edificación levaba en titularidade pública dende o ano 2005 e trala súa rehabilitación, que conta cun orzamento de 313.365 euros, serán pisos de alugueiro social.
A empresa adxudicataria é Sunne Galiza, que foi a que presentou a mellor oferta das dúas que mostraron interese no concurso. Rebaixou o presuposto inicial en 20.000 euros e ofertou un menor prazo de execución dos traballos. O período de tempo inicial era de 270 días e Sunne Galiza rebaixouno a 200.
O edificio terá que estar listo antes de outubro debido a que, o Instituto Galego de Vivenda e Solo así o marca nas bases desta actuación. Esta entidade aporta unha achega de 240.000 euros que se completa con outra axuda do Grupo de Desenvolvemento Rural Miño-Ulla de 102.755 euros.
O edificio dividirase en cinco pisos e un baixo para uso municipal. Na planta baixa haberá dous pisos, na primeira outros dous e un na bufarda. Estes pisos terán ente 66 e 83 metros cadrados.
En setembro de 2019 a Casa dos Ulloa foi vítima dun incendio que puido ser intencionado e que obrigou a levar a cabo traballos de consolidación para arranxar os danos que provocou o lume.
Este novo proxecto conta co permiso de Patrimonio, necesario ao estar este edificio no casco histórico e no Camiño Francés.