O Concello de Vilalba decidiu aprazar a celebración do Entroido en Vilalba, prevista para mañá, 1 de marzo, ata o domingo 6 debido ás previsións meteorolóxicas, pero mantendo os memos horarios e programa anunciado. O enterro da sardiña permanece no mesmo día e hora: mércores 2 de marzo ás 20 horas na Praza da Constitución.
As persoas e comparsas participantes farán un desfile pola vila a partir das 17.00 horas, con saída da rúa Castelao, o lado da estación de autobuses de Vilalba, para pasar despois por Campo de Puente, rúa da Pravia e rematar na praza da Constitución.
Poden participar e optar aos premios e axudas, ademais dos particulares e parellas, calquera asociación ou entidade legalmente constituída, así como os “grupos ocasionais” que cumpran as condicións establecidas nestas bases.
Haberá premios para as mellores comparsas Infantil e xuvenil (de 0 a 14 anos) e para as mellores comparsas de Adultos (a partir de 15 anos) e Mixtas (adultos e nenos). Na categoría individual e por parellas, para Infantil e Xuvenil (0 a 14 anos) e Adultos (máis de 15 anos).
O premio de maior cuantía será de 700 euros para a mellor comparsa mixta. Haberá tamén premios para as comparsas máis orixinais e simpáticas, ademais de 1.000 euros a repartir entre todas as comparsas que participen e non obteñan premios (máximo 100 euros por comparsa).
Todos e todas as participantes obterán un vale de chocolate con churros, e os nenos e nenas menores de 14 anos un agasallo.
O mércores 2 de marzo, o concello mantén o Enterro da Sardiña, ás 20:00 horas na praza da Constitución, no que tamén se repartirá chocolate con churros.
