Skip to main content
Comarca LUGOXA

A subdelegada do goberno Isabel Rodríguez reuníuse cos alcaldes da zona da Fonsagrada

Por 12 Marzo, 2022Sin comentarios

A subdelegada do Goberno, Isabel Rodríguez, explicou a alcaldes e responsables municipais da Fonsagrada, Baleira e Negueira de Muñiz o novo incentivo que pon en marcha o Goberno para facilitar o acceso á vivenda a mozos e mozas nos concellos menos poboados da provincia. A subdelegada deulles a coñecer unha liña de axudas que está destinada a favorecer o asentamento de poboación nova nos municipios con menos de 10.000 habitantes. Na reunión, que tivo lugar na Casa do Concello da Fonsagrada, participaron os alcaldes deste concello, Carlos López; o de Negueira de Muñiz, José Manuel Braña, e o primeiro tenente de alcalde de Baleira, Miguel Ángel Fernández.

Isabel Rodríguez trasladoulles que o Ministerio de Transportes, Mobilidade e Axenda Urbana creou este programa de subvencións á adquisición ou arrendamento de casa co dobre obxectivo de facilitar o acceso á vivenda da xente nova ao tempo que trata de axudar a atraer poboación aos concellos con menos habitantes e informou de que nos tres concellos son 1.461 os mozos e mozas maiores de 18 anos e menores de 35 os que se poden acoller a este novo programa de axudas que poderían beneficiarse destas axudas.

Rodríguez anunciou que o Goberno concederá unha axuda de ata 10.800 euros para aqueles mozos e mozas que decidan adquirir unha vivenda para uso habitual en municipios de menos de 10.000 habitantes. Esta subvención tamén se estende á mocidade que opte polo alugueiro no lugar de comprar vivenda. Os beneficiarios e beneficiarias serán aquelas persoas que no momento de solicitar a axuda teñan 35 anos ou menos.

A subdelegada destacou que este programa “facilitará que a mocidade opte polas vilas e os pequenos municipios á hora de iniciar o seu proxecto de vida” e destacou o impacto que pode ter na nosa provincia pois “61 dos 67 concellos entran dentro desta categoría de poboación”.

Isabel Rodríguez incidiu en que o obxectivo que se fixa o Goberno con estas novas axudas é axudar a asentar poboación nova nos pequenos concellos para frear o seu declive. Lembrou que o reto demográfico é una política transversal do Goberno de España, que se reflicte naqueles programas e medidas que teñen impacto sobre a poboación e o territorio como poden ser a vivenda, os servizos públicos e o impulso a actividade empresarial.

AXUDAS PARA COMPRA E ALUGUER

O Programa de axuda ás persoas mozas para contribuír ao reto demográfico é un dos trece programas que forman parte do novo Plan estatal de Acceso á Vivenda 2022-2025, aprobado polo Goberno. O obxectivo deste programa é atraer xente moza aos concellos máis pequenos, facilitando o asentamento de poboación nestes territorios.

Para isto contémplanse dúas axudas, unha axuda á compra de vivenda, de ata 10.800 euros ou ata o 20% do total de prezo da vivenda. O prezo da vivenda non deberá ser superior a 120.000 euros e outra ao alugueiro por cinco anos. Será una axuda mensual que cubrirá ata o 60% da renda mensual, ata un máximo de 360 euros. Esta axuda será compatible co bono de alugueiro xoven de forma que pode cubrir ata o 75% do custe do alugueiro.

CONVOCATORIAS AUTONÓMICAS

A subdelegada explicou que estas axudas teñen vixencia dende o 1 de xaneiro polo que, no momento en que se convoquen as ordes correspondentes, beneficiarían os contratos asinados xa dende comezos deste ano.

Explicou que o Ministerio de Transportes, Mobilidade e Axenda Urbana, organismo responsable do Plan Estatal, dispón dos fondos nas partidas orzamentarias deste ano que serán transferidos á Xunta, pois será esta administración a que se ocupa da convocatoria das axudas.

En anos anteriores, o Plan Estatal de Vivenda subvencionou con 800.000 euros a compra de vivenda por menores de 35 anos en concellos galegos de menos de 5.000 habitantes. A resolución destas axudas correspondentes á convocatoria de 2021 publicouse o pasado mércores, día 9 de marzo, no Diario Oficial de Galicia.