O Partido Popular considera “inadmisible que despois de oito concelleiros de urbanismo; despois de nomear a un coordinador para a área de urbanismo e despois de designar a un novo xefe de servizo Lugo sexa un territorio comanche á hora de conseguir unha licenza para rehabilitar unha vivenda; crear un negocio, facerse unha casa, construír un almacén agrícola ou unha nave industrial”.
O Grupo Popular presentou un informe no que se analizan os datos do propio goberno municipal xa que reflicte todas as licenzas resoltas en xuntas de goberno celebradas no ano 2021. A lectura das actas é reveladora xa que certifica “o ritmo lentísimo co que se están tramitando as peticións de obra maior no Concello de Lugo”.
Antonio Ameijide declarou que “á vista destes datos queremos saber cantos expedientes están aínda sen informar no servizo de Arquitectura e en que data se rexistraron”. O viceportavoz popular engadiu que “queremos saber canto diñeiro de investimento privado ten bloqueado o bigobierno por falta de axilidade na tramitación dos expedientes”.
Ameijide tamén lembrou que “en arquitectura seguimos sen atención presencial e sen unha dirección política clara xa que o concelleiro Álvaro Santos segue de baixa”. Os populares lembran como “neste mandato dimitiu Miguel Couto e neste momento, de forma interina, ocúpase da área Paula Alvarellos co apoio dunha figura que coordina que é a do interventor”.
