O Concello de Folgoso do Courel lanza unha iniciativa con motivo do Día da Muller coa que homenaxear ás súas veciñas. Para iso convidan a quen queira participar a enviar por correo electrónico unha fotografía e unha breve explicación de por que esas mulleres son os seus referentes.
Nais, avoas, fillas, estudantes, traballadoras, emprendedoras, todas as mulleres do Courel serán homenaxeadas coa axuda das mesmas.
O pasado ano o Concello fixo unha exposición sobre mulleres galegas na Historia, ás que este ano engadirán a todas esas mulleres do Courel que tamén forman parte da historia da vila.
Quen queira participar ten que mandar unha fotografía e un breve texto da muller que elixa ao correo servizossociais@folgosodocourel.com
A idea é telas para o día 8 de marzo, para a mostra que se exhibe no Concello de Folgoso do Courel. As que cheguen despois desa data iranse incorporando. A iniciativa permanecerá aberta todo o mes de marzo.
