Hoxe, sábado 23 de abril, Láncara acollerá unha actuación do circuíto teatro afeccionado da Deputación. Os Palimoquiños levarán ao polifuncional do Campo da Feira da Pobra de San Xiao a obra Borralliña. Unha representación dirixida a público infantil e familiar que dará comezo ás 12.00 horas.
Nesta obra, participan trece actores e actrices do grupo xuvenil da Escola de Teatro Palimoco de Lugo.
SINOPSE
Hai moito moito tempo, había un país moi rico gobernado por un Rei e unha Raíña xustos e bondadosos. El chamábase Cintolo e ela Madrepérola. Eran moi felices xunto co seu fillo Azul Celeste. Só unha preocupación atenazaba os seus corazóns, o desexo de ver ao seu fillo casado…
ESCOLA PALIMOCO TEATRO
A Escola Palimoco teatro ofrece adestramento actoral de corpo e voz, construcción de personaxes, dramaturxia, historia do teatro, danza para actores e actrices… Clases dende os 3 anos en adiante. Coa posibilidade de formar parte do elenco dun dos grupos da Escola segundo idade e nivel, participando na montaxe e mostra dun espectáculo teatral.
Esta iniciativa conta coa colaboración de Asociación Cultural Abrente (As Nogais), Axóuxeres (Vilaronte, Foz), Hipócrita Teatro (Lugo), Grupo de Teatro do Hospital – HULA (Lugo), Os Palimoquiños (Lugo), Curuxan (Lugo), Nova Escena Teatro (Lugo), Lume Escénico (A Pontenova), O Centiño (Foz), O Torques (Burela), Os Trocos (Castro de Rei), Pico do Castro (Foz), Alentía Teatro (Palas de Rei), A Mariña (Cervo), Grupo de Teatro da Biblioteca Municipal de Antas de Ulla, Metátese Teatro (Palas de Rei), Os Pinchacarneiros (Lugo), Argalleiras (Chantada) e Teatreiras (Monforte).
