Skip to main content
Comarca AMARIÑAXA

A Pontenova, Trabada, Ribadeo e San Tirso de Abres piden a recuperación da senda do ferrocarril

Por 4 Maio, 2022Sin comentarios

Os catro municipios solicitaron a colaboración para executar este proxecto ao Secretario de Estado de Medio Ambiente.

A alcaldesa de Trabada, Mayra García Bermúdez; o alcalde de A Pontenova, Darío Campos Conde; o alcalde de Ribadeo, Fernando Suárez Barcia; e o alcalde de San Tirso de Abres (Asturias), Clemente Martínez Rodil reuníronse co secretario de Estado de Medio Ambiente, Hugo Morán Fernández, para solicitar a súa colaboración na recuperación da senda verde do ferrocarril. As vías verdes buscan recuperar os trazados inutilizados de tren, converténdoos en sendas accesibles, cómodas e seguras para ciclistas e peóns.

Nesta reunión, os representantes municipais presentaron os proxectos realizados en 2002 e 2010 ao secretario de Estado. Hugo Morán comprometeuse a realizar un novo estudo da situación actual, xa que nos últimos anos os municipios realizaron actuacións nesta senda ou teñen previsto realizalas. 

Neste sentido, os representantes municipais coinciden na necesidade dun proxecto que integre os diferentes tramos existentes e complete os restantes para darlle continuidade de Ribadeo a A Pontenova.

O proxecto suporá un trazado de 30 quilómetros, entre Ribadeo e A Pontenova, de vital importancia para o territorio xa que implica unha recuperación medioambiental e un revulsivo económico para a zona. Ademais, trátase dun proxecto interautonómico, ao percorrer Galicia e Asturias. 

Unha vez realizado o estudo sobre a situación actual, valoraranse as posibilidades de financiamento, así como as entidades competentes, para coordinar entre todas elas os recursos necesarios.