Unha nova edición do Lucus in Vino Veritas terá lugar este sábado, 21 de maio, no atrio da Catedral de Lugo. A Deputada de Réxime Interior, Promoción do Territorio e Turismo, Pilar García Porto, participou hoxe na presentación desta cita vitivinícola que celebra xa a súa terceira edición.
A Deputada destacou a importancia de que o Goberno Provincial colabore en citas como esta que “se enmarcan no noso modelo de promoción do territorio a través dun turismo de calidade, de experiencias, sostible e non masificado”, expresou.
A Deputación de Lugo colabora con este evento cunha achega de preto de 2.000 euros para a posta en valor da actividade vitivinícola “un dos piares estratéxicos da economía lucense”, sinalou a Deputada.
“Dende a Deputación de Lugo impulsamos unha programación na que se atopan as rutas polo románico da provincia con motivo do Día da Transrománica, e tamén estamos desenvolvendo o programa de turismo deportivo e de aventura Actívate ou o programa de viaxes Coñece a túa provincia”, recordou a Deputada.
Lucus in Vino Veritas contará nesta edición con máis de 20 expositores nos que se poden atopar viños da Ribeira Sacra e da zona de Negueira de Muñiz, pero tamén doutras zonas de Galicia e da Península, sendo a primeira vez que participa unha adega portuguesa. Como novidade, este ano organízase unha conferencia para os adegueiros e adegueiras enfocada a un mellor aproveitamento do negocio.
Pilar García Porto felicitou aos organizadores pola iniciativa e desexoulles éxito nesta nova edición.