Maite Ferreiro, vicepresidenta da Deputación de Lugo, recibiu onte no Museo de Lugo a un grupo de membros do padroado do Museo do Pobo Galego, que este sábado realizaron unha viaxe guiada a Lugo. A visita ás salas e ao claustro do Museo de Lugo foi parte dun itinerario, con outros puntos de interese patrimonial, histórico e artístico da cidade nos que tamèn se detiveron como a Domus de Mosaicos, o conxunto da Porta Miñá, a Casa do Mitreo, a Catedral ou o Vello Cárcere.
A Vicepresidencia da Deputación segue así a reforzar os lazos co Museo do Pobo Galego, que recibe da área de Cultura unha achega anual de 15.000 euros para contribuír ao funcionamento e actividade do Museo, centrada en investigar, conservar, divulgar e promover a cultura galega en todos os seus ámbitos.
