Skip to main content
As Pontes

As Pontes investirá máis de medio millón en reurbanizar a praza de América

Por 29 Maio, 2022Maio 30th, 2022Sin comentarios

O Concello das Pontes, a través do Plan Único da Deputación da Coruña, activa un ambicioso proxecto de 569.608 euros para reurbanizar a Praza de América, un espazo situado no centro urbano do Concello das Pontes e que está ligado á historia recente da localidade.

A Praza de América nace da man da construción da escola, o actual CEIP Santa María, no ano 1929 grazas á achega de fondos por parte da Sociedad de Instrucción Naturales del Ayuntamiento de Puentes de García Rodríguez, formada por emigrantes ponteses na Habana. A relevancia que tivo este equipamento foi o xerme de que os terreos situados na súa fronte se configurasen como un dos principais espazos de lecer da vila, constituíndose como unha praza destinada a eventos públicos franqueada pola avenida de Ortigueira (hoxe avenida de Castelao) e a avenida de Coruña.

Co paso do tempo a praza foise transformando. Na década dos 80 tivo lugar un cambio radical na concepción do espazo, realizando unha intervención que supuxo a elevación do espazo en relación coas avenidas perimetrais, aproveitando o desnivel xerado para construír un edificio semisoterrado, utilizado en orixe como ‘Fogar da terceira idade’ e que hoxe alberga a ‘Biblioteca municipal Enrique Rivera Rouco’.

Solucionar as eivas da estrutura actual

Esta última intervención na Praza de América, que modificou a súa natureza orixinal, fixo que saísen á luz unha serie de eivas como a falta de accesibilidade por mor dos desniveis xerados, tanto internamente como con respecto ás vías perimetrais, así como a escasa funcionalidade que ten pola carencia de mobiliario urbano axeitado e a falta de zonas de resgardo fronte ao sol e á choiva, ademais de dispoñer de escasos espazos verdes. Por outra banda, o edificio da biblioteca municipal, situado no vértice sur baixo a praza, sofre constantes filtracións de auga procedentes da cuberta.

Por todo isto, o obxectivo principal da actuación, que está en proceso de licitación, é ordenar o ámbito en termos de funcionalidade, seguridade e accesibilidade atendendo a criterios de calidade ambiental, de eficiencia enerxética e de sustentabilidade.

A recuperación dos valores orixinais perdidos

Segundo explicou o alcalde das Pontes e presidente da Deputación, Valentín González Formoso, os eixes fundamentais da proposta para a Praza de América son, por unha banda, a recuperación dos valores orixinais perdidos, como son o papel protagonista da escola ou a relación coas rúas perimetrais e o carácter de paseo do coñecido na vila como ‘Paseo dos Americanos’, e, pola outra, a creación de espazos útiles tanto para o uso diario como ámbito de lecer así como para a celebración de eventos.

Así, a estratexia que se formula para volver á configuración orixinal da praza pasa por proceder á demolición do edificio da biblioteca municipal. Unha vez suprimida esta barreira, a intención é que as vías perimetrais, recentemente urbanizadas, definan o relevo no interior da praza mediante a extensión das superficies, asimilando as súas pendentes e establecendo unha plataforma á mesma cota.

No nivel da avenida da Coruña, crearase un espazo diáfano de pavimento duro, totalmente libre de obstáculos, configurado como área na que se acollan eventos, mercados, feiras, concertos, festas… Unha aliñación de arborado de castiñeiros das indias definirá sutilmente o límite entre o espazo da rúa e o ámbito da praza.

Do outro lado do triángulo, o lateral leste, a área que xurde da prolongación do espazo público da rúa Castelao concíbese como unha ampla ladeira verde. No ámbito intermedio, vencellado coa rúa Ramón Cabanillas, proxéctase unha zona de paseo protexida do ruído e do tráfico na que se crearán recunchos de estancia cun carácter máis intimista, reinterpretando o ‘Paseo dos Americanos’ e que estará franqueada por unha banda verde que resolverá a diferencia de cota.

Por último, como medios para salvar o desnivel, faranse conexións puntuais como escaleiras e unha rampla accesible que conectará a avenida da Coruña co novo paseo, disporanse farois en columnas de alturas variables con proxectores LED, instalarase mobiliario urbano e as pertinentes redes de drenaxe e rega.